De fútbol y otres coses

Acabo ver la final de la Lliga Champiñones ente'l Liverpool y el Milán. Los nuevos gladiadores na arena verde. Y como siempre la visión del partíu tráxome dellos pensamientos.

¿Qué lleva a un honráu trabayador o, peor entá, a un esforzáu de la cola'l paru, a fundir lo que nun tien nun viaxe llocu percorriendo media Europa, antroxáu en dios mitolóxicu griegu con camiseta futbolera? ¿Qué secretos mecanismos del nuestru subconsciente nos lleven a sentinos destrozaos ente la derrota d'un equipu al que namás nos xunce un sentimientu?

Confiésolo, ye un misteriu pa mi. Hai coses nesta vida poles que sería quien a andar nun decenes sinon centenes de kilómetros, a fundir les perres que tengo y les que nun tengo, pero'l fútbol nun ta ente elles. Puedo, y de fechu fáigolo, tragar lo intragable de fútbol de críos pol amor al mio fíu. Puedo, y de fechu fáigolo, dir a ver perder (cuasi siempre que voi pierde) al mio Sporting al Molinón. Incluso sería quien a montame nun autobús y echame unos cuantos cientos de kilómetros al llombu pa velu nuna final importante por ver namás l'allegría espeyada nos güeyos d'ún de los mios fíos(el futboleru). Pero más allá nada.

¿Qué fae qu'esi esforzáu paisanu que nun mueve un deu nin un pie por defender derechos básicos, seya quien a dalo too por unos collores, por aplaudir a unos gladiadores enriquecíos col so amor? ¿Que fae pa qu'esi mesmu home, que se fartuca en llamar lladrón o mangante a tou políticu o al vecín vea normal tol circu que se monta si con ello-y dan la sensación de victoria? ¿Tan probetaya ye la nuestra vida que necesitamos de daquién que gane dalguna batalla por nós?