De fútbol y otres coses

Güei volví asistir pela tele a otru d'esos espeutáculos incalificables que nos da'l fútbol.

Los xugadores de primera del Valencia F.C. taben entrenando y unos descerebraos presentarense a insultalos.

A mi siempre me llamó l'atención la cantidá d'hores de folgancia que tien la xente, porque hai que tar folgáu pa gastar unes cuantes hores en facer unes pancartes y presentase con elles a insultar a unos que tán trabayando (si se pue llamar trabayar a lo que faen).

Los héroes d'ayer son los diaños de güei. De la qu'entama una nueva Lliga los periódicos infórmennos de la burrada millones qu'esti o l'otru equipu funden en contratar a esti o al otru xugador. Y que los xugadores van equí o ellí por perres y títulos nun ye nengún misteriu. Nun hai probes en primera división de fútbol.

Les perres son una parte, abondo importante, pero consiguir oxetivos (el títulu, la permanencia o lo que seya) tamién pa los propios xugadores. Pue haber amás amor a los colores, pero eso ta dempués. ¿Qué fae Villa nel Valencia sinón, por un dicir?

A naide nun s'engaña nesti tingláu y si dalgún ta engañáu ye que ye bobu. Entós, ¿a qué vien facer pancartes pa llamar chaqueteros a los xugadores? Nun lo sabíen de mano. ¿A qué vien que l'afición eche pol presidente de turnu que normalmente ye'l que paga les factures y arriesga les perres? ¿Qué faen toos esos descerebraos indignaos y avergoñaos por daqué que no fondero nin-yos va nin-yos vien?

Los mesmos descerebraos qu'esti mes echen a un entrenador por inútil y dientro dos van recibilu al aeropuertu a pidi-y de rodielles que quede y otros dos meses dempués tán alcordándose de tola so familia.

Pero yá lo dicía Einstein: Nun sé con certeza que l'universu seya infinitu, peró sí que la estulticia humana lo ye.

Esta selmana trai una nueva vuelta de tuerca nesto del fútbol.

En USA va munchu tiempu yá que tienen claro que un partíu, de béisbo, de baloncestu o de lo que seya nun ye namás qu'un espectáculu. Hai xente que prefier ver a cinco o venticinto indumentaos pelear (metafóricamente) con otros tantos que ver una pelicula o lleer un llibru.

Pero n'Europa tovía hai quien piensa nos deportes como una llucha trival de nós escontra ellos. Va tiempu que nun ye así, pero ilusión entá se caltién. Ún va a ver al Sporting (o al que seya) pensando que son "los guerreros de la nuestra tribu".

Pero esta selmana acaba de dase una vuelta más na tuerca d'esta mentira. Dende que los equipos son SAD (menos dalgunes esceiciones esplicables ya inesplicables) yá sabíemos que los equipos tienen amos, magar siguimos pensando que los dueños son los socios.

Pero ye qu'agora acaba demostrase que nun namás tienen dueños y qu'estos puen cambiar. Ye qu'hasta se pue cambiar un equipu del so sitiu y convertir ún recién inventáu n'equipu d'élite. El Ciudá de Murcia, equipu con curtia historia, esapaez. Los aficionaos que punxieren les sos ilusiones nesti equipu surdíu de la nada tornen quedar ensin nada. Nun hai camiseta que sudar nin tribu que defender. Por arte de perres el Ciudá de Murcia conviértese en Granada 74, equipu creyáu de la nada.

Cualaquier día podemos ver aportar a un nueu ricu, comprar un equipu como l'Uviéu y decidir que marcha con él pa onde quiera. Llegaremos al casu de quien la tien más grande, o d'otra manera, quien tien más perres. Que'l Zaragoza, por un dicir, pierde'l so sitiu en primera, pues nada, si'l dueñu tien perres, cómpralu y arreglao.

Pero millones de persones siguirán interesaos en too esto y siguirá habiendo aficionaos que llamen a los xugadores que lo faigan mal "mercenarios" como un insultu.

Yá lo dicíen los galos: "Tan llocos estos romanos".

Acabo ver la final de la Lliga Champiñones ente'l Liverpool y el Milán. Los nuevos gladiadores na arena verde. Y como siempre la visión del partíu tráxome dellos pensamientos.

¿Qué lleva a un honráu trabayador o, peor entá, a un esforzáu de la cola'l paru, a fundir lo que nun tien nun viaxe llocu percorriendo media Europa, antroxáu en dios mitolóxicu griegu con camiseta futbolera? ¿Qué secretos mecanismos del nuestru subconsciente nos lleven a sentinos destrozaos ente la derrota d'un equipu al que namás nos xunce un sentimientu?

Confiésolo, ye un misteriu pa mi. Hai coses nesta vida poles que sería quien a andar nun decenes sinon centenes de kilómetros, a fundir les perres que tengo y les que nun tengo, pero'l fútbol nun ta ente elles. Puedo, y de fechu fáigolo, tragar lo intragable de fútbol de críos pol amor al mio fíu. Puedo, y de fechu fáigolo, dir a ver perder (cuasi siempre que voi pierde) al mio Sporting al Molinón. Incluso sería quien a montame nun autobús y echame unos cuantos cientos de kilómetros al llombu pa velu nuna final importante por ver namás l'allegría espeyada nos güeyos d'ún de los mios fíos(el futboleru). Pero más allá nada.

¿Qué fae qu'esi esforzáu paisanu que nun mueve un deu nin un pie por defender derechos básicos, seya quien a dalo too por unos collores, por aplaudir a unos gladiadores enriquecíos col so amor? ¿Que fae pa qu'esi mesmu home, que se fartuca en llamar lladrón o mangante a tou políticu o al vecín vea normal tol circu que se monta si con ello-y dan la sensación de victoria? ¿Tan probetaya ye la nuestra vida que necesitamos de daquién que gane dalguna batalla por nós?

Nun acabo entender el por qué, pero los homes necesitamos ser d'una tribu y, amás, si podemos o nos dexen d'una tribu ganadora. Tampoco se sabe mui bien por qué, polo menos yo nun lo sé, pero nesesitamos competir o qu'otros compitan por nós si nun somos a ello.
Facer y, más que nada, ver deporte ye un fechu universal. Nun pienso qu'haya cultura ensin los sos ídolos deportivos. Y falar de deporte n'Europa ye falar de fútbol. Y por eso abro yo esti blog, pa falar más que nada de fútbol, anque pue ser que nun ten llibres otros deportes.
Pero nun se trata de falar de futbol por él mesmu. Yo nun soi aficionáu al AS nin al Marca, nin al Sport nin al Mundu Deportivu. Ye más, nun soi entender como hai xente que los llee. Lo interesante d'esti tema, si ye que tien dalgún interés de verdá, cuéntase y sobra colo que traen los periódicos normales.
Amás, yo soi d'un equipu perdedor, lo que nun gusta a la mayor parte la xente. Fales con esti o col otru y paez ser que hai que ser del Madrid o del Barça, n'esclusiva o amás de. Si daquién te pregunta y dices direutamente, del Barça, nun siguen diciendo "¿y dempués?", pero si dices otru entós sí.
Pues nun soi de nengún d'ellos y ye más, por querer quiero que pierdan los dos. Yo namás voi colos míos y col más débil, ello ye, el de menos presupuestu. Nos últimos mundiales yo diba con Trinidad y Tobago.

¡Ah!, por si dalgún lo quier saber: soi del Sporting.